सुपरम्यान र ब्याटम्यान लड्दै

सान डियगो – 'सुपरम्यान' शृंखलाको गत महिनाको सुपर हिट फिल्म 'म्यान अफ स्टिल'को दोस्रो भाग त बन्ने भएको छ नै, त्योभन्दा ठूलो समाचार उक्त शृंखलामा डिसी कमिक्सको अर्को सुपरहिरो ब्याटम्यान पनि समेटिने भएको छ। निर्देशक ज्याक स्नाइडरले शनिबार बताए अनुसार उक्त शृंखलामा सुपरम्यान र ब्याटम्यान एकअर्कासँग भिड्नेछन्।

सान डियगोमा भएको वार्षिक कमिक कन्भेन्सनमा निर्देशक स्नाइडरलाई विशेष अतिथिको रुपमा सहभागी गराइएको थियो। उनी स्टेजमा उक्लिदा कन्भेन्सनका ६ हजारभन्दा बढी सहभागीहरुले ताली बजाएर सम्मान दिएका थिए। दुई सुपरहिरोलाई एकसाथ प्रस्तुत गर्ने मात्रै नभई दुईबीचको फाइटलाई पनि विशेष उपहारको रुपमा प्रस्तुत गरिने निर्देशक स्नाइडरले खुलाए।

'सुपरम्यान र नयाँ ब्याटम्याबीचको भिडन्त अद्भूत हुने आशा गरौं,' उनले आग्रह गरे। यस शृंखलाको निर्मातामा ब्याटम्यान फिल्म 'डार्क नाइट'का निर्देशक क्रिस्टोफर नोलान रहनेछन्। सुपरम्यान र ब्याटम्यान दुवै डिसी कमिक्सका पात्र हुन्। सुपरम्यानमा 'म्यान अफ स्टिल'का हेनरी क्याभिल नै जारी रहेछन् भने ब्याटम्यानको रुपमा क्रिस्टियन बेल देखिने छैनन्। नयाँ अनुहारको खोजी भइरहेको छ।
बेलद्वारा अभिनित पछिल्लो ब्याटम्यान फिल्म सन् २०१२ को 'द डार्क नाइट राइजेज'ले संसारमरबाट एक अर्ब डलर उठाएको थियो। 'म्यान अफ स्टिल'ले चाहिँ ६२ करोड १० लाख डलर कमाइसकेको छ। ब्याटम्यान र सुपरम्यान एउटै फिल्ममा आउने गाइगुइँ चाहिँ पहिलेदेखि नै थियो।
ब्याटम्यानको भूमिका कसले खेल्छ भन्ने नखुलाइए पनि फिल्मको रिलिज भने २०१५ को ग्रीष्ममा हुने टुंगो लागिसकेको छ।