अग्ला नायकसँग झरनाको ‘नो स्मोकिङ’

चलचित्रको पर्दामा चुरोट, सुर्ती, खैनीको प्रयोग धेरै नै हुने गरेको छ । हुनत अहिले चलचित्रमा कलाकारले धुम्रपान गरिरहदा ‘ स्वास्थयको लागि हानिकारक छ’ भन्ने लेखिएको हुन्छ । तर एक चलचित्रले भने स्मोकिङको विरोध नै गर्ने भएको छ ।यसअघि ‘मन परेपछि’ निर्देशन गरेका सुमन दाहाल ‘नो स्मोकिङ’ बनाउन कस्सिएका छन् । यो चलचित्रको मंगलबारबाट छायांकन सुरु भएको छ । चलचित्रमा झरना थापा, संजय खतिवडा, महिमा सिलवाल, रमेश बुढाथोकी, दिनेश डीसी, दिनेश देवकोटा, अमृता पाण्डेको मुख्य भूमिका रहनेछ ।

चलचित्र ‘नो स्मोकिङ’मा अनमोल शर्मा, सरोज प्याकुरेल र शंकर अधिकारीको लेखन, टंक बुढाथोकीको संगीत, दिव्य सुवेदीको छायांकन, हिमाल केसीको द्वन्द्व, विकास घलेको नृत्य रहनेछ । चलचित्रको छायांकन सिन्धुपाल्चोक, काठमाण्डौ, दोलखा लगायतका क्षेत्रमा गरिने निर्देशक सुमन दाहालले जानकारी दिएका छन् । खैरावङ्ग फिल्मको व्यानरमा तयार हुन लागेको चलचित्रमा मुरारी पोखरेलको कथा र निर्माण रहने छ ।